Atzo Hego Euskal Herrian egindako 16.826 probek 1.775 positibo berri atzeman zituzten: 638 Gipuzkoan, 641 Bizkaian, 330 Nafarroan, 158 Araban eta zortzi EAEtik kanpo bizi direnen artean. Datua kezkagarria da, izan ere, proben %11,45ek eman zuten emaitza positiboa EAEn, eta %7,8k Nafarroan.
Bestalde, ospitaleetan 109 lagun ingresatu zituzten, eta guztira 181 daude ZIUn, azken datuaren arabera.
"Beharrezko neurriak", Sagarduirentzat
Bilakaera epidemiologikoak gora egitearen ondorioz, asistentzia-presioa gero eta handiagoa dela azaldu du Osasuneko sailburuak, eta, hortaz, gaur indarrean sartu diren neurrien alde egin du: "Datuek berretsi egiten dute Eusko Jaurlaritzak gaur indarrean jarriko den dekretuan jasotako neurriak gogortzeko hartutako erabakia".
Horrez gain, osasun-sistemaren kolapsoa saihesteko, "zuzen" jardun behar dela gogorarazi du. "Gure bizitza soziala eta mugikortasuna ahalik eta gehien murrizteko eskatzen diet pertsona guztiei, bestela konfinamendura kondenatuta egongo baikara ", esan du Sagarduik.
