Azaroaren 20tik abenduaren 4ra egingo Euskaraldiaren xehetasunak azaldu dituzte gaur, eta ordezkariek bi datu nabarmendu nahi izan dituzte. Alde batetik, azaldu dute 2018ko lehen edizioan baino udalerri gehiago batu direla egitasmora: guztira, 421 udalerritan osatu dira batzordeak. Bestetik, aurtengo edizioko berrikuntza nagusia den ariguneei dagokienez (euskaraz lasai aritzeko entitate ezberdinek sortutako espazioak), 25.091 arigune sortzeko prozesuak abiatu direla esan dute: “Saltoki eta zerbitzu emale txikiak, elkarteak, hezkuntza arloko eragileak, zerbitzu enpresak eta erakunde publikoak izan dira kopurutan aipagarrienak, baina horiekin batera egon dira enpresa txikiak, gizarte eragileak, sindikatuak eta bestelakoak ere”.
Antolatzaileak pozik agertu dira, izan ere, onartu dute COVID-19ak eragindako egoeran "oso zaila" izan dela dela herrietan batzordeak martxan jarri eta entitateekin lana egitea.
Ahobizi edo belarriprest izateko deia
Izen-ematea egunetik egunera haziz doala azaldu dute agerraldian, eta hurrengo asteotan emango dituzte norbanakoen lehenengo datuak. Dena den, oraindik izena emateko aukera zabalik dago webgunean, edota herrietako batzordeetan eta mugikorrerako aplikazioan.
