Paseoek "izaera terapeutikoa izango dute nagusiki" eta adinekoek "bakarrik edo profesionalek nahiz hurbilekoek lagunduta" egin ahal izango dituzte ibilaldi horiek, "prebentzio eta higiene neurri guztiekin" eta "espazio jendetsu edo itxiak" saihestuta. Gizarte Politikako departamentuak zehaztu du, gainera, ez zaiela irteteko baimenik emango sintomak dituzten erabiltzaileei edota berrogeialdi zein isolamendu egoeran daudenei. Bizikidetza unitatean COVID-19rekin bateragarriak diren sintomak dituzten familiek ere ez dute bisitarik egingo edo senideak paseatzera aterako.
Foru Aldundiak erabaki duenez, Elgoibarko zaharrentzako eguneko zentroak itxita jarraituko du herriko datu epidemiologikoak aztertu ondoren. Arrazoi bera dela medio, Mutrikuko eguneko zentroaren itxiera prebentiboa ezarri du Aldundiak. Bi herrigune horietako adineko zentroetan, gainera, egoiliarrak ezingo dira paseatzera irten.
