HIES eta STI Euskal Planaren urteko Memoriak jasotakoaren arabera, Giza Immunoeskasiaren Birusa hartutako 6.000 paziente baino gehiago artatu zituen Osakidetzak iazko urtean. Gauzak horrela, Osasun Sailak eta Osakidetzak "gizartearen "sentsibilizazioa handitzearen alde" egin nahi dute, sexu-transmisiozko infekzioak "etengabe" hedatzen ari direla-eta.
Osakidetzak hiru kontsulta ditu sexu-harremanen bidez hartutako infekzioak berenberegi lantzeko; Bilbon, Donostian eta Gasteizen daude. Azaldu dutenez, iaz, munduko joerarekin bat etorriz, gehikuntza egon zen diagnostikoetan: 711 chlamyidia kasu artatu zituzten (iaz baino 18,7 gehiago), 260 herpes genital (iaz baino % 66,7 gehiago), 412 infekzio gonokoziko (% 16 gehiago) eta 249 sifilis goiztiar (% 35,3 gehiago). GIBari dagokionez, kasuak ez dira areagotu: 147 izan dira erregistratutako kasu berriak, eta iaz, 171.
Osakidetzaren arabera, 2019an, guztira 6.057 pazienteri eman zien arreta tratamendu antirretrobiralekin; 2018an, berriz, 5.852 pazienteri.
Arreta, prebentzioan
2.040 GIB test bizkor egin dira aurten EAEko farmazietan, eta 12 positibo hauteman dira horrela. Bestetik, espezializatutako kontsultek 96 autotest banatu dituzte etxean egiteko eta 129.080 xiringa-kit ere banatu dira (84 mila baino gehiago farmazietan eta 44 mila baino gehiago GKEen bidez).
Azkenik, Osasun Sailak adierazi du aurreko ikasturtean 8.500 nerabek parte hartu zutela GIB/hies, STI eta nahi gabeko haurdunaldiak prebenitzeko programetan.