EAEn 27 positibo berri atzeman dira PCR proben bidez: 3 Araban, 16 Bizkaian eta 8 Gipuzkoan. Halere, Debagoienean ez da kasu berririk hauteman. Bestetik, oinarrizko birsorkuntza tasa 1,56koa da, eta horrenbestez, aurreko egunetako joera jarraituz, pandemia hedatzen ari da oraindik EAEn.
Bezperako datuak jasotzen dituen txosten epidemiologikoak ez dakar datu gehiago gaur, beraz, ezin da jakin, besteak beste, zein den ospitaleetako egoera edota zenbat heriotza erregistratu ziren atzo. Osasun Saileko komunikazioko kideek azaldu dutenez, "Osakidetzaren baitan izandako arazoak" izan dira ezohiko txostena argitaratzearen arrazoia.
Sei kasu, Nafarroan
Nafarroako Osasun Sailak jakinarazi duenez, 6 positibo atzeman dira azken orduetan, eta horietako bat Tuterako agerraldiarekin lotutakoa da; guztira, 37 dira orain arte foku horretatik eratorritakoak. Bestetik, bi alta eman zituzten atzo eta ez zen ospitaleratze berririk erregistratu.
