Ezohiko segurtasun neurriak dira hauteskundeotako ezaugarri nagusia, eta herritarrak errespetatzen ari dira

Larraitz Zeberio Lekuona 2020ko uzt. 12a, 14:53

Hautesleku guztiek dituzte bereiztutako sarrerak eta irteerak. Musukoa derrigorrezkoa da guztietan, eta horrekin batera sarreran eskuak garbitzea. Jende pilaketak saihesteko eta distantziak mantentzeko seinaleak daude lurrean. Oñatin, tenperatura ere hartzen ari dira.

Ez ohikoa izan da hauteskunde kanpaina eta ez ohikoa izaten ari da hauteskunde eguna ere. INE estatistikarako erakundearen arabera 50.043 debagoiendar daude botoa ematera deituak, eta 23 hautesleku daude bailaran, guztira 71 mahairekin. Ohikoa baino hautesleku gehiago dira eta horietako asko lekuz aldatu dituzte espazio handiagoak eta zabalagoak izateko.

Pandemia baten erdian datoz Eusko Legebiltzarrerako hauteskundeok, eta nabariak dira segurtasun neurri bereziak. Maskara erabiltzea eta sartu aurretik eskuak garbitzea derrigorrezkoa da. Horrekin batera segurtasun distantziak mantendu behar dira botoa ematerakoan ere eta pilaketak ekidin behar dira.

Debagoiendarrak eginbide horiek ondo betetzen ari dira. GOIENA hautesleku batean baino gehiagotan izan da eta denetan 'normaltasun berrira' egokitutako neurriak hartzen ari direla ikusi du. Herritar asko, gainera, botoa etxean prestatuta eraman dute hauteslekura. Mahaiko kideek ere neurri bereziak bete behar dituzte gaur eta goizean goiz jasotako gomendioak betetzen ari dira.

Desinfekzio lanak

Hautesleku guztietan egin behar dituzte desinfekzio lanak, aldiro-aldiro. Bergaran, esaterako, bi ordutik bi ordura desinfektatzen dituzte hauteslekuak. Mahaiak, aulkiak, boto-lekuak eta barandak, ahalik eta garbiketa lan sakonena egiten ari dira hainbat langile.

Eguerdia arteko datuak emateko agerraldia egin du Segurtasun sailburu Estefania Beltran de Herediak, eta jakinarazi du parte-hartzea %1,3 jaitsi dela 2016ko hauteskundeekiko, eguneko lehen hiru orduetan. %14,1ekoa izan da, gaur, EAEn.

Erlazionatuak

Debagoiendarrak hauteslekuetan botoa ematen

Larraitz Zeberio Lekuona 2020 uzt 12 Debagoiena

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak