Bihar, egubakoitza, zehaztuko dute zein lurralde pasatzen diren bigarren fasera. Behin hori zehaztuta, urrats hori ematen duten probintzietan, kalera ateratzeko ordutegiak ezabatuko dituzte. Orain arte, 5.000 biztanletik gorako herrietan, hiru tarte bereizten dira kalera ateratzeko: 06:00etatik 10:00etara eta 20:00etatik 23:00etara, kirol jarduerak egiteko edo paseatzera irteteko; 10:00etatik 12:00etara eta 19:00etatik 20:00etara, mendekotasunen bat dutenak eta 70 urtetik gorakoak irteteko; eta 14 urtetik beherakoak, 12:00etatik 19:00etara.
Aurrera-pausu hori emango balitz, Espainiako Gobernuak egoerarik zaurgarrienean dauden herritarrentzat ordutegi zehatz bat ezartzea gomendatuko du. Udalen eta autonomia erkidegoen esku egongo da hori horrela egitea.
Eskaera bidalita
Eusko Jaurlaritzak bere proposamena bidali dio astean Osasun Ministerioari, hain zuzen ere, Arabak, Bizkaiak eta Gipuzkoak deskonfinamenduaren bigarren fasera igarotzeko baldintza guztiak betetzen dituela iritzita. Eusko Jaurlaritzaren ustez, "egoera epidemiologikoa eta asistentziala ona da, zaintza eta kontrol neurriak hartzen ari dira" eta, horregatik egin dute fasez aurrera egiteko proposamena.