Gipuzkoako bi zentro gehiago geratu dira COVID-19az libre: Ordiziako San Jose eta Zumarragako Argixao. Hurrenez hurren, bost eta hiru lagunek jaso dute senda-agiria. Baita Eibarko San Andres egoitzako bi egoiliarrek ere. Beraz, jada 11 dira birusa atzean utzi duten egoitzak eta kasu positiborik ez dutenak. Zentro horiek dira: Tolosako Iurreamendi, Eibarko Egogain, Irungo Caser Residencial Anaka, Zarauzko Santa Ana, Hondarribiko Caser Residencial Betharram, Zumaiako Otezuri, Donostiako Aita Etxe, Beasaingo Arangoiti, Donostiako La Paz, Ordiziako San Jose eta Zumarragako Argixao.
358 egoiliar sendatuta
Gaur gaurkoz, 358 dira mediku alta jaso dutenak; 167 zendu dira eta 33k dute koronabirusa.
Bozeramaileak adierazi du "beste egun batez, oso berri onak iritsi zaizkigu egoitzetatik", hala ere, gaineratu du “zuhurtziaz eta arduraz" jarraitu behar dela lanean gaixotasun honen aurrean zaurgarrienak diren pertsonak babesteko. Bestalde, egoitzetako lantaldeak eta osasun langileak egiten ari diren lan "nekaezina" eskertzeaz gain, esker on mezu hori zabaldu die egoitza zentroetako garbiketa eta desinfekzio lanean ari direnei. Azken egunetan berriro desinfektatu dituzte Arangoiti (Beasain), Iurreamendi (Tolosa), Argixao (Zumarraga), Santa Ana (Zarautz), San Juan de Dios (Arrasate), San Jose (Ordizia), Iturbide (Arrasate) eta Otezuri (Zumaia).
