Osasun-bermeak betetzen badira, maiatzaren 18an, Batxilergoko 2. mailako ikasleak, Goi Mailako Lanbide Heziketakoak (1. eta 2. mailak) eta Erdi Mailako eta Oinarrizko Lanbide Heziketako 2. mailakoak itzuliko dira jardun presentzialera. Astebete beranduago, hilaren 25ean, DBHko 4. mailako ikasleak, Batxilergoko 1. mailakoak eta Erdi Mailako Lanbide Heziketako 1. mailakoak itzuliko dira.
Bestetik, maiatzaren 25etik aurrera, hezkuntza bereziko ikastetxeak eta gela terapeutikoak ere irekiko direla jakinarazi du Uriartek, eta hortaz, familiek aukera izango dute haurrak ikasgeletara eramateko.
Bete beharreko neurriak
Ikasgeletarako “normaltasunerako bueltak” hainbat aldaketa ekarriko du, eta ikasle, irakasle eta gainerako langileek neurri zorrotzak bete beharko dituzte.
Alde batetik, 1,5 metroko tartea utzi beharko da mahai batetik bestera, eta guztiek erabili beharko dituzte maskarak eskola-esparruan daudenean. Gainera, ikastetxeek erabakitako neurriak betez, sarrera-irteerak ere mailakatuak izan beharko dira, eta jolastokietan ere txandak egin beharko dituzte, denak aldi berean batera egon ez daitezen. Eskola-orduei dagokienez, 5 orduko ordutegi trinkoa izango dute jardun presentzial berriek.
Jantoki zerbitzuaz ere aritu da Uriarte, eta bertan behera mantenduko dela azaldu du, “osasun eta segurtasun neurriak lehenesteko”.
