Astelehenean, maiatzaren 4an hasiko da 0 fasearen bigarren astea. Egun horretan hainbat neurri ipiniko dira indarrean. Besteak beste, garraio publikoetan maskarak erabiltzearen derrigortasuna. Hori horrela, Sanchezek esan du sei milioi maskara banatu dituela gobernuak. Gaineratu du, zazpi milioi maskara banatuko direla herrietan, eta beste milioi eta erdi askotariko gizarte eragileen artean. "Neurri zorrotzak hartuta egin dugu aurrera, eta malgutasunarekin ere, zorrotz jarraitu behar dugu pausuak ematen", esan du.
Era berean, astelehenetik aurrea, denda txiki eta negozio batzuek irekitzeko aukera izango dute, baina mugekin: bezeroei arreta indibiduala eskaini beharko diete aurrez txanda eskatuta. 65 urtetik gorakoei lehentasuna eskainiko zaie ordutegi batzuetan. Gainera, etxera eramateko janaria prestatzen duten jatetxeak lanean hasiko dira, eta baita kirolari profesionalak eta federatuak. Hori bai, bakarka egin beharko dituzte entrenamenduak.
Alarma egoera luzatzeko eskaera
Pedro Sanchezek gaineratu du maiatzaren 9ra arte onartuta dagoen alarma egoera luzatzeko eskaera berria egingo duela Ministroen Kontseiluan. Martitzenean egingo duen proposamena izango da hilaren 23ra arte luzatzea. Dena den, gaurko agerraldian esan du, hamabostero, alarma egoera luzatzeko eskaera egingo duela. "Parlamentuaren babesa behar dugu egoera honi aurrera egiteko".