Arrasatek eta Aretxabaletak bina kasu positibo izan dituzte eta Bergarak bat; hala, azken bi egunetan kurba geldi egon ostean gorantz egin du zertxobait.
Lurraldeetako datuei dagokienez, Gipuzkoan, kutsatutako 34 kasu berri egiaztatu dituzte, Araban 58, Bizkaian 245 eta Nafarroan 254. Gainera, azken egunean COVID-19 gaitzak jota hil direnak hemeretzi izan dira EAEn, eta hamasei Nafarroan. Guztira, Hego Euskal Herrian 1.722 pertsona zendu dira orain artean, eta kutsatu metatuak –uneren batean positibo eman dutenak– 21.022 herritar. Horietatik errekuperatu direnak, ostera, 12.556 dira.
Nekane Murga Jaurlaritzako Osasun sailburuak adierazi du EAEko ospitalean jarraitzen dutela 686 lagunek, atzo baino 42 gutxiagok: "Datuek adierazten dute gaixotasunaren transmisioa murrizten dabilela". Kutsatutakoak 15.138 dira guztira EAEn (baieztatutako kasuak) eta horietatik %69 berreskuratuta edo alta emanda daudela gaineratu du.
Atzo izan zen orain arte "test gehien" egindako eguna EAEn: 10.662 proba egin zituzten guztira, 5.163 PCR motakoak eta 5.499 test azkarrak. Era berean, jakinarazi du osasun arloko langileen artean 23.000 test baino gehiago egin direla, eta Osakidetzako langileen artean 13.353 PCR, "langileriaren heren bati baino gehiagori" hain zuzen ere. Test azkarrak edo serologiakoak egiten ere badabiltzala gaineratu du.
>Grafiko guztiak modu interaktiboan ikusi hemen.
Datuak herriz herri
Debagoienean, bost positibo berri egon dira. Honenbestez, 375era igo da bailaran egiaztatuko COVID-19 kasuen kopurua.
Kutsatze-tasa 100.000 biztanleko (2018ko INEren biztanleria datuetan oinarrituta):
| Herria | Positiboak | 100.000 biztanleko kutsatze-tasa |
| Arrasate | 221 | 1003,68 |
| Oñati | 44 | 388,18 |
| Aretxabaleta | 46 | 658,37 |
| Bergara | 43 | 294,60 |
| Eskoriatza | 13 | 318,08 |
| Antzuola | 4 | 187,27 |
| Aramaio | 2 | 134,86 |
| Elgeta | 2 | 176,21 |
| Leintz Gatzaga | 0 | 0,00 |
Bi gako kutsatzea ez hedatzeko
Hemendik aurrerako bidea gakoak bi izango direla eman du aditzera: kutsaduraren prebentzioa eta identifikatzea lehenbailehen sintomak izan dituztenak. Kutsadura ez zabaltzeko betebeharrak gogorarazi ditu: bi metroko distantzia mantentzea; beste batzuekin kontaktua ekiditea; garbitasuna mantentzea, eskuak eta gainazalak sarri garbituta; eta sintomarik atzemanez gero isolatzea –baita etxean ere– eta osasun etxera deitzea.