Azken orduetan medikuaren senda-agiria jaso duten lagunak bizi dira Eibarko San Andres egoitzan (10), Arrasateko Iturbiden (5), Tolosako Iurreamendin (2), Zarauzko Santa Anan (2) eta Hondarribiko Caser Residencial Betharramen (1); azken honetan gaitzak jota zegoen bakarra sendatu da. Azken heriotzak, berriz, eman dira Aretxabaletako GSRn, Donostiako La Pazen, Eibarko Egogainen eta Ordiziako San Josen. 32 lagun daude Donostiako Gurutze Gorriaren zentro soziosanitarioan ingresatuta eta 35 ospitalean.
Eider Mendoza foru bozeramaileak gaur-gaurkoz dauden datuen berri ere eman du: 189 lagun osatu dira, 153 heriotza izan dira eta 202k jarraitzen dute diagnostiko positiboarekin. 65 zentro dituen egoitza sarean (5.425 egoiliar), orain arte, hamaseik izan dituzte kasu positiboak baina hamabostera jaitsi da hori.
