Ekimenak ingurumena eta pertsonak erdigunean jartzearekin batera, justizia soziala eta klimatikoko irizpideak izango duen itzulera aldarrikatuko du. Gauzak horrela, apirilaren 24ean, 22:00etan, balkoietatik etxe-aurretarantz soinu eta itzalak proiektatzea eta argazki eta bideoak sare sozialetan erakustea eskatu dute antolatzaileek.
Ekimen honen antolatzaileek gogorarazi dute krisi klimatikoa errealitate gordina dela, buruzagi askok onartu ez duten arren. Horregatik, gobernuak larrialdi klimatikoaren egoera bere gain hartu beharko lukeela eta neurri zorrotzak hartu beharko lituzkeelakoan daude erakunde sozialak. Izan ere, azpimarratu dute, gaur egun larrialdi klimatikoren aurrean irmo jokatzen bada, etorkizunean ingurumenak eta gizarteak inpaktu okerrenak jasatea saihestuko litzatekeela. Gauzak horrela, eragile sozialek proposatzen dute jarduera ekonomikoa modu klimatiko eta zuzen batean eraldatzea.