Kutsatu kopuruari dagokionez, 37 kasu positibo berri atzeman dituzte lurraldeko egoitzetan, eta guztira 178 dira kutsatuta dauden egoiliarrak. Gurutza Gorrian, egun, 34 pertsona ari dira artatzen, eta bederatzi dira ospitaleratuta daudenak. Oraingoz, Gipuzkoako 14 egoitza kaltetu ditu gaitzak. Debagoienean, gaur-gaurkoz, Arrasateko Iturbide da koronabirus kasuak dituen bakarra.
Aldundiak laguntza teknikoak eta ekonomikoak eskaini dizkie Gipuzkoako egoitza baliabideetako erabiltzaileak aldi baterako etxera itzultzea eskatzen duten familiei. Hala, 7.000 lagun artatzen dituzten 240 zentroz osatutako saretik, 150 pertsonek eskatu dute etxera itzultzea, Eider Mendoza foru bozeramaileak azaldu duenez, "eta gehienak desgaitasuna duten pertsonen egoitzetan eta bizikidetza unitate txikietako egoiliarrak dira".