360 positibo gehiagorekin, 8.187 dira guztira EAEn agertu diren koronabirus kasuak: 2.539 Araban, 4.224 Bizkaian eta 1424 Gipuzkoan. Horixe azaldu du Eusko Jaurlaritzako Osasun Plangintzako zuzendariak Miguel Sanchezek atzo 20:00ak arteko datuen berri emateko egindako agerraldian. Hildakoak, aldiz, 33 gehiago izan dira eta denera 477 pertsonak galdu dute bizia Erkidegoan koronabirusaren ondorioz. Une honetan, 1.858 pertsona daude ospitalean COVID-19 gaitzagatik, eta 3.098ri eman zaie alta; atzo, 289ri.
1.286 pertsonari egin zioten koronabirusaren proba atzo, eta %28k eman du positiboa. Azken hogei egunetako kopuru baxuena da hori eta Sanchezek adierazi du datu horrek baieztatzen duela azken egunetan egon den joera aldaketa. Herritarren jarrera eskertu du, baina ez erlaxatzeko gaineratu.
Nafarroari dagokionez, 136 positibo gehiago zenbatu dituzte azken 24 ordutan, eta 2.972 dira kutsatutako herritarrak. Foru Erkidegoan 20 pertsona hil dira azken 24 ordutan; pandemia hasi zenetik, 171.
Debagoienean, zazpi
Debagoienaren kasuan, zazpi pertsona gehiagori antzeman diote koronabirusa: Arrasaten seiri, eta Bergaran bati. Gainerako herrietan ez da kutsatu gehiago agertu. 173 koronabirus kasu agertu dira orain arte Debagoienan: Arrasaten 91 kasu daude; Oñatin, 25; Aretxabaletan, 23; Bergaran, 22; Eskoriatzan 7; Antzuolan eta Aramaion, bina; eta Elgetan, bat.
Guztira hamasei pertsona daude Arrasateko ospitalean koronabirusaren ondorioz, eta azken 24 ordutan bi pertsonari eman diote alta.
Grafiko gehiago ikusi modu interaktiboan hemen
'Txatbot'-a martxan
Erkidegoko ospitaletan egoeraz galdetuta, ZIUak egonkortasun egoeran daudela azaldu du Miguel Sanchezek, eta gaineratu du mota horretako 60 ohe libre daudela. Jaurlaritzak eskaintza egin arren, EAEko ospitaletan une honetan beste erkidegoetako gaixorik ez dagoela ere azaldu du. Iragarri du, gainera, Eusko Jaurlaritzak 'txatbot' bat jarri duela martxan herritarren zalantzak argitzeko koronabirusari eskainitako webgunean.