Nekane Murga Eusko Jaurlaritzako Osasun sailburuak eman ditu COVID-19ren azken datuak. Kutsatuen zifra 7.317ra igo da, azken orduetako 479 kasuak gehitu ostean. Gainera, 1.906 gaixo daude ospitalean; 17 Arrasateko ospitalean.
Araban, guztira 2.347 kasu atzeman dituzte orain artean, horietatik 341 daude ospitalean. Bizkaian 3.682ra igo da zifra totala eta 1.201 dira ospitalean dauden kutsatuak. Gipuzkoan, guztira, 1.288 koronabirus kasu daude eta 364k jasotzen dute arreta ospitalean.
Sailburuak esan du dagoeneko birusa detektatzeko 18.220 proba egin dituztela, 1.399 atzo. Hori kontuan izanik honakoa azpimarratu du: "Zenbat eta proba gehiago egin, orduan eta positibo gehiago atzematen ditugu, baina hori da gure helburua". Gainera nabarmendu du, atzo egindako testetan 10etik 3k eman zutela positibo, eta aurreko astean 10etik 6 zirela.
Hildakoak gora, baita sendatutakoak ere
43 pertsona hil dira azken orduetan EAEn. Zifra altua dela esan du Murgak eta onartu du "ziurrenik" hildakoen kopuruak gora egiten jarraituko duela. Osasun krisia hasi zenetik, 412 lagun hil dira Araba, Bizkaia eta Gipuzkoan.
Hala ere, kutsatuen joera begiratuta "egonkortasun" fasean dagoela errepikatu du gaur ere. Bestalde, osatutakoak edo alta emandakoak ere gero eta gehiago direla esan du. Atzo 265 alta eman zituzten EAEko ospitaletan, eta beraz, guztira 2.490 dira sendatutakoak dagoeneko.
Datuak herriz herri
Grafiko gehiago ikusi hemen.
| Herriak | Positiboak guztira |
| Arrasate | 78 |
| Oñati | 24 |
| Aretxabaleta | 23 |
| Bergara | 20 |
| Eskoriatza | 7 |
| Antzuola | 2 |
| Aramaio | 2 |
| Elgeta | 1 |
EAEn kutsatutakoak adin tarteka
| Adina | Positiboak guztira |
| 0-9 | 19 |
| 10-19 | 45 |
| 20-29 | 326 |
| 30-39 | 665 |
| 40-49 | 1089 |
| 50-59 | 1396 |
| 60-69 | 1273 |
| 70-79 | 1161 |
| 80-89 | 942 |
| 90 urte edo gehiago | 401 |
Osakidetzako informazio buletina osorik ikus dezakezu hemen.