Sanchezek iragarri du "ezinbestekoak ez diren lanetan" aritzen diren langileak etxean geratu beharko direla martxoaren 30etik apirilaren 9ra. "Ordainpeko baimen berreskuragarria" ematea erabaki du Madrilgo Gobernuak; zortzi egunez luzatuko da, Aste Santura arte, eta langileek berreskuratu beharko dituzte orduak. Sanchezek azaldu du "erabateko itxierari" alternatiba bat izango dela, langileak etxean geratuko diren bitartean soldata jasoko dutelako. Hori bai, langile horiek gero ordu guztiak berreskuratu beharko dituzte.
"Oso beharrezkoa" den neurria "ekonomiaren erabateko geldialdia" saihesteko
Hala azaldu du neurria Sanchezek: "Oso beharrezkoa zen neurria da ekonomikoaren erabateko geldialdia saihesteko. Adituek esan digute pandemia geldiarazten lagunduko duen neurria dela eta uste dugu gizartea prest dagoela neurri hori onartu eta gauzatzeko".
Sanchezek zehaztu duenez, martxoaren 29ko ministroen ezohiko batzarrean emango dira ezinbesteko jarduera horien berri. Hala ere, aurreratu du funtsezko jarduera horien artean kazetaritza dagoela: "Hedabideek zerbitzu esentziala eskaintzen dute, sekulako lan garrantzitsua ari dira egiten krisialdi honetan".