Miguel Sanchez Jaurlaritzako Plangintza, Antolamendu eta Ebaluazio zuzendariak eskaini du gaur prentsa agerraldia. Berak jakinarazi ditu Araba, Bizkaia eta Gipuzkoako azken datuak eta bestelako informazioa ere eman du. EAEn 543 gaixo berri egon dira azken egunean, guztira 3.271 koronabirus kasu daude.
Bizkaian daude gaixo gehien, 1.501 dagoeneko, horietatik 310 ospitalean. Araban 1.207 dira positiboak eta 674 daude ospitalean. Gipuzkoan 563 kasu atzeman dituzte eta horietatik 163 ospitalean daude. Bestalde, 407 lagunek ospitaleko alta jaso dute.
Testak autotik jaitsi barik
8.735 pertsonei egin dizkiete orain artean detekzio-probak, 1.199 atzoko egunean, Sanchezek azaldu duenez. Izan ere, dagoeneko martxan jarri dute autotik irten gabe testak egiteko sistema; kasu batzuetan autoan izan beharrean, karpak jarriko dira eta beste batzuetan osasun zentroan bertan egingo dituzte. Hala ere, osasun arloko langileei eta kolektibo zaurgarriei edo Osasun sailak zehazten dituen pertsonei bideratuta egongo dira soilik. Arrasateko ospitalean ere astelehenetik martxan dago sistema berria.
Datuak herriz herri
Herriak | Positiboak |
Arrasate | 27 |
Aretxabaleta | 11 |
Oñati | 9 |
Bergara | 8 |
Eskoriatza | 3 |
Antzuola | 1 |
Aramaio | 1 |
EAEn kutsatutakoak adin tarteka
Adina | Positiboak |
0-9 | 17 |
10-19 | 34 |
20-29 | 156 |
30-39 | 318 |
40-49 | 466 |
50-59 | 603 |
60-69 | 583 |
70-79 | 531 |
80-89 | 416 |
90 urte edo gehiago | 147 |
Koronabirusak hildako pertsonen kopuruari dagokionez, 22 hil dira azken 24 orduetan, guztira 155 dira dagoeneko. Honenbestez, orain artean hildakoen datuak hauek dira: 20-29 urte arteko pertsona bat; beste bat 40-49 urte bitartekoa; sei 50-59 bitartekoak; hamalau 60-69 urte bitartekoak; hogeita hamabi 70-79 urte bitartekoak; hirurogeita zortzi 80-89 urte bitartekoak eta hogeita hamabi 90 urte edo gehiagokoak.
Osakidetzako informazio buletina osorik ikus dezakezu hemen.
161 mediku berri
Osasun sistema indartzeko asmotan, azken BAME Barne Mediku Egoiliarren frogan gutxieneko nota gainditu zuten ikasleak kontratatuko ditu Osakidetzak. 161 mediku berri egongo dira lanean datozen egunetan ospitale ezberdinetan, horietatik hamabi gaur bertan hasi dira lanean Araban.
Horretaz gain, Miguel Sanchezek azaldu du, EHUrekin harremanetan dabiltzala, erizain eta medikuntzako ikasleak ere, laguntzaile moduan osasun zerbitzura gehitzeko.