Gaurko prentsaurrekoan Nekane Murga Osasun sailburuak eta Estefania Beltran de Heredia Segurtasun sailburuak hitz egin dute. Murgak, egoerak larria izaten jarraitzen duela azpimarratu du: "Gaur ere datuak larriak dira, eta gure adituen arabera, hurrengo egunetan ere egoera ez da hobetuko. Beraz, Osakidetzan aldaketak egiten jarraituko dugu, birusari aurre egiteko".
Murga sailburuaren arabera, EAEko kutsatuen %30 baino gehiago ospitaleratuta daude eta gune gehiago prestatzen ari dira gaixoak artatzeko. Horien artean nabarmendu du hotel bat prestatzen ari direla. Bestalde, gaineratu du ez direla autonomia erkidegoen arteko sendatze-tasak alderatu behar, erabiltzen diren irizpideak ez baitira guztietan berdinak.
Gainera, sailburuak zehaztu duenez, koronabirusa atzemateko 7.047 proba egin dituzte denera; horietako 800 atzo. Test azkarrei dagokienez, jakinarazi du momentuz ez dituztela jaso, eta ministerioak esan duela aste amaieran helduko direla.
Isunak
Bere aldetik, Beltran de Heredia sailburuak esan du, Ertzaintzak eta Udaltzaingoak 866 salaketa jarri zituztela atzo EAEn, baina kasu horiek "salbuespena" direla eta gizartea "ondo" erantzuten ari dela egoera berriari.
Bestalde, sailburuak nabarmendu nahi izan du Euskadin %69 jaitsi direla arau-hauste penalak. Ildo horretan, herritarrei gogorarazi die beraien kolaborazioa ere garrantzitsua dela eta arau-hausteak salatzera gonbidatu ditu. Horretarako, gogorarazi du herritarrek eskura dituztela bi aplikazio: 112 SOS Deiak edo Ertzaintzarena.
Horretaz gain, Segurtasun sailburuak esan du Ertzaintzako deskontaminazio taldeko kideak gaur bertan hasiko direla hainbat lan egiten Gasteizen, eta bihartik aurrera, suhiltzaileak ere eginkizun horretara batuko direla.