Zuzendaritza eta antolakuntza batzordeko kideek azaldu dute, egoera sakon aztertu ostean, 2020ko hiru lasterketak bertan behera uztea erabaki dutela. "Ekitaldi hauek aurrera ateratzeko orain arte egindako lana eta ilusio guztia ez dira nahikoa izango gure lasterketen ezaugarri diren oinarrizko bi zutabe nagusiak erabat ziurtatzeko: korrikalarien eta boluntarioen erabateko segurtasuna eta lehiaketen kalitatea".
Erantsi dutenez, "tristura handiz" hartu dute erabakia, baina beti bezala, lehiaketetako protagonistengan pentsatuta". Amaitzeko, euren "eskerrik zintzoena" adierazi diete boluntario, laguntzaile eta babesle guztiei eta orain, euren indar guztia pandemiaren kontra jartzeko ordua dela ekarri dute gogora, "etorkizun laburrean berriro mendiaz eta mendi lasterketez gozatzeko aukera izan" dadin.
