Elkartasun Sare Antolatua
Sortu berri den Elkartasun Sare Antolatua erosketak egin ezin duten, farmaziara joan ezin diren edota bestelakoak behar dituzten pertsonei laguntzeko sortu da. Sare horretan, boluntario-eskaera guztiak zentralizatuko dira eta egoera horien jarraipena telefono bidez egingo da.
TAO sistema eta Udal zergak
TAO sistemari dagokionez, etxeetara zerbitzua ematera joaten diren osasun-langileek ez dute TAOrik ordaindu beharko eta Udalek ibilgailu horien matrikulak izango dituzte. Horrez gain, udal zergak eta tasak ordaintzeko epea luzatu egingo da.
Osoko bilkurak eta batzorde bilerak
Osoko bilkura eta batzorde bilerei dagokienez, hiru neurri jakinarazi ditu Eudelek martxoa amaitu bitartean bete beharko direnak: lehenengoa, ezinbestekoak diren osoko bilkura eta batzorde bilerak egitea; bigarrena, egiten diren batzorde bileretan talde bakoitzeko zinegotzi bakarra egotea eta zinegotzien botoa talde horretako bozeramailearen edo zinegotzi arduradunaren esku uztea eta azkenik, pertsonen arteko distantzia (metro bat gutxienez) errespetatzea eta horretarako, osoko bilkura edo batzorde bilera leku zabalago batera eramatea.
Kontratazioak
Eudel udalek egindako kontratazioei buruzko txosten bat egiten ari da, non hainbat esparruri buruzko gomendioak emango diren: azpikontratatutako enpresek ematen dituzten zerbitzuak etetea eta azpikontratatutako langileen egoera, azpikontratatutako enpresei jakinarazpenak egitea, enpresa horiei gastuak konpentsatzea, epe administratiboak etetea eta kontratua eteteko edo zerbitzua bertan behera uzteko gehieneko epea.
