Urtero moduan, denboraldi bukaerako produktuak saltzeko antolatzen dituzte merkealdi azokak. Denboraldi berriko produktuak sartu ahal izateko aurreko denboraldiko produktuak likidatzen dituzte prezio baxuan.
Bergaran beste urte batzuetan denda denak elkartu eta frontoian egin izan dute azoka. Aurten, denda bakoitzak bere produktuak denda aurrean izan ditu eta horrek jende gehiago erakarri duela dio Bedelkarreko presidente Maitane Azkaratek:" Denda aurrean arropa ikusgai egoteak jende gehiago erakartzen du. Gainera, eguraldi ona egin du eta jende asko hurbildu da arropa ikustera".
Oñatin ere Txanda dendari elkartearen eskutik, Azken Txanpa merkealdi azoka egon da. Herritar asko kalera irten dira neguko stock-aren azken eskaintzak aprobetxatzera.
Aretxabaletan berriz, eguenean eta egubakoitzean antolatu zuten Aretxarteko kideek Ixadebalde azoka. Mojen komentuan, herriko sei merkatari elkartu ziren herritarrei udazkeneko eta neguko stocka "prezio ezin hobean" eskaintzeko.
