Txinparta bertso eskolako bertsolari gazteek Dizdaitte izeneko sariketa abiatuko dute bihar, zapatua. "Bertso berriak elkarri jarriak izeneko mikro-sariketa antolatu genuen orain dela urte batzuk, eta lehenengo esperimentu horren ondoren abiatu genuen Oñatiko bertsolariekin Txinparta sariketa gero, eta bihar, sariketa berria abiatuko dugu. Hau da, Euskal Herriko bertsolari gazteei zuzenduta dagoena".
Hamabi bertsolari izango dira lehiatzen, guztira, eta eskualdekoez gain, antolatzaile taldeko Gontzal Belategik azaldu du ahalegina egin dutela Euskal Herriko ordezkaritza zabala egoteko: "Sariketetan ohikoa izaten da lurralde guztietako parte hartzaileak izatea, eta gurean ere hala izatea nahi genuen; hortaz, Gipuzkoako, Bizkaiko, Arabako, Iparraldeko eta Nafarroako ordezkariak izango dira. Guztiak bertsolari gazteak, baina eskarmentua dutenak, aldi berean. Debagoienekoei dagokienez, sei izango dira: Oñatiko Maider Arregi, Aitor Tatiegi eta Urko Arregi; Peru Abarrategi aramaioarra; Ane Zuazubiskar arrasatearra; eta Oihana Arana eskoriatzarra. Lurraldetasunaz gain, genero aldetik ere orekatua izatearen alde egin dugu".
Tabernetan eta gaztetxean
Bi kanporaketa egingo dituzte, seina bertsolarirekin bakoitzean. "Zalantza genuen tabernak halako saioetarako toki aproposak ote ziren, baina, publikoari gauzak errazte aldera, Pako eta Ikatz tabernetan egitea erabaki genuen, eta finala Antixena gaztetxean. Sarrera doakoa izango da".
Sariketetako, "ohiko ariketak" proposatuko dituzte Txinpartakoek: "Gaiak denetarikoak izango dira; eta ariketei dagokienez, honako hauek: agurra, zortziko handia eta zortziko txikia, hamarreko txikia, puntu-erantzunak eta bakarkakoa. Finalean, hamarreko txikiaren ordez sei puntuko motza sartuko dugu".