Aurkeztutako aurreproiektuaren arabera, autobia errepide tarte ezberdinetan banatuko dute eta ordainsaria horren arabera aplikatuko da:
- Beasaingo arkua, 2,8 km: Beasainetik (0 Kilometro Puntua) Ormaiztegiko lotuneraino (2,8 KP).
- Ezkioko arkua, 5,4 km: Ormaiztegiko Alegiako lotunetik (5 KP) Zumarragako lotuneraino (10,4 KP).
- Deskargako arkua, 7,3km: Urretxu/Legazpiko lotunetik (12,5 KP) Bergarako ekialdeko lotuneraino (19,8 KP). Irteera/sarrera Antzuolako erdilotunean 2,5 km.
Dokumentuan zehazten denez, Legazpi/Urretxu - Antzuolako erdilotunea deritzon ibilbidea aplikatu ahal izateko ezinbesteko izango da ibilgailuak TAG gailu bat erabiltzea bidaia ordaintzeko.
Bidesaria ibilgailu motordun edo ibilgailu talde artikulatu guztiek ordaindu beharko dute, motozikletak izan ezik. Azaldu dutenez, ibilgailuak detektatzeko, identifikatzeko eta haiei kanona egozteko free flow izeneko sistema ireki bat ezarriko da, ibilgailuak gelditu gabe.
Kanonaren zenbatekoak
| Ibilbidea | Kilometroak | Arinak | Ibilgailu astunak 1 | Ibilgailu astunak 2 |
| Beasain-Ormaiztegi | 2,8 | 0,38 | 0,61 | 0,78 |
| Ormaiztegi-Zumarraga | 5,4 | 0,74 | 1,18 | 1,50 |
| Legazpi/Urretxu-Bergara | 7,3 | 1,41 | 2,32 | 2,87 |
| Legazpi/Urretxu-Antzuola | 2,5 | 0,48 | 0,79 | 0,98 |
Aintzane Oiarbide eguenean Goiena telebistan
Bidesariari buruzko azalpenak eskainiko ditu Aintzane Oiarbide Bide Azpiegituretako diputatuak Goiena telebistan. Otsailaren 6ko Hemen Debagoiena saioan elkarrizketatuko du Txomin Madinak.
Bidesariaren aurkako sinadura bilketa
Bidesariaren aurkako taldea sortu da Urretxu-Zumarragan eta sinadura bilketa abiatu dute Change.org-en. Urretxutik Bergarara joateko ordaindu egin beharko zela jakinekoa zen aurretik ere, eta horrela azaldu zuen Oiarbidek Goiena telebistako Harira saioan, 2019ko otsailean: "Autopista bat da, beraz, bidesaria izango du". Dagoeneko 6.500 sinadura lortu dituzte eta helburua 7.500ean ezarri dute.