Abenduren 19an elkartu ziren Chillida-Lekun Gipuzkoako Foru Aldundia eta eskualdeetako turismo ordezkariak. Bileran izan ziren Imanol Lasa Ekonomia Sustapeneko, Turismoko eta Landa Inguruneko diputatua, Iker Goiria Turismo zuzendaria, Cristina Iturriagagoitia San Sebastian Region turismo bulegoko arduraduna eta sektorearen eskualdeetako arduradunak; horien artean Ana Heriz Debagoieneko Mankomunitateko turismo teknikaria.
Azaldu dutenez, orain artean foroak "izaera informalagoa" izan du eta horregatik adostutakoen artean dago hemendik aurrerako "lan dinamika" berria. "Kalitatezkoa eta lurraldean orekatua izango den turismo eredu batean sakondu nahi badugu, aberastasuna sortu eta herritarren ongizatea aintzat hartuko duena, eskualdeen ikuspegia eta errealitatea jaso behar ditugu. Dinamika eraginkor eta jarraitu bat ezarri behar dugu, besteak beste, turismo fluxuak Donostiatik harago banatzeko, urte osora hedatzeko edo egonaldien batez bestekoa handitzeko erronkei arrakastaz aurre egiteko", adierazi du Lasak.
Helburu horri erantzun bateratua emateko, Turismoaren Plan Estrategikoa egiteko eskualdeetako arduradunen ekarpenak bildu dira; Gipuzkoak helmuga turistiko adimendun gisa dituen aukerei buruzko azterketa ezagutarazi da; lurraldea sustatzeko hurrengo ekintzak –Fitur, Navatur, Sevatur, Basques a Bordeaux…– aurkeztu dira; 2020ko Turismo Gidaren berri eman da; Gipuzkoako Turismo Bulegoaren sorreraz aritu dira, eta sektorean gaurkotasunezkoak diren gaiak landu, hala nola tasa turistikoa ezartzeko abian diren ekintzak.
