"Familia biltzeko modua aurkitu dugu liburua elkarrekin eginda"

Beñat Alberdi Igartua 2019ko abe. 7a, 08:21
Errasti-De la Maza familia liburua elkarrekin sortzen. (Argazkia: Ander Errasti)

Jon eta Maite seme-alabek orain dela lau urte proposatu zioten Ander Errasti euren aitari elkarrekin liburu bat idazteko. Aitak kaleratuta zituen hainbat liburu, eta gaztetxoek ere sormenaren plazara hurbildu nahi zutela adierazi zioten.

Iaz argitaratu zuten lehen liburua eta kalean dute bigarren atala ere: Herensugeen itzulera V Sataripeko Guda. Autoekoizleen gunean izango da eskuragarri eta domekan Saguganbaran egingo dute aurkezpena.

Liburua hasieratik bukaerara sortu du familiak. Elkartu eta mapa bat prestatu zuten hasteko, pertsonaiak deskribatu eta bozetoak egin zituzten gero, historia idatzi ondoren, eta gertaeren irudiak marraztu zituzten segidan. Dinamika ondo ikasi zuten lehenengoarekin, eta parekoa izan da bigarrenean ere. Sormena lantzeko bide ona dela nabarmendu du Ander Errastik, eta baita haurrak hobeto ezagutzeko ere: "Pertsonaiei eurek gehitu dizkiete ezaugarriak; eurek nahi zuten modukoak dira".

Hiru hizkuntzatan

Alabak hala eskatuta, oraingoan emakume bat da protagonista: Etiam. Eraso egingo diote Etiamen Aragreb herriari. Neskatilak, ordea, itsasontzi bat atonduko du herritarrekin batera eta aurre egingo die piratei. Euren izenei buelta erdi emanda sortu dituzte pertsonaien izenak, eta toki ezagunei buelta erdi emanez gertakarienak. Hiru hizkuntzatan –euskaraz, gaztelaniaz eta ingelesez– irakurri daiteke istorioa. "Hiru hizkuntzak nahastu ditugu. Berez, 8 eta 9 urte bitartekoei bideratuta dago, baina ingelesa ikasteko baliagarria da 11 urteko gaztetxoendako ere".

Proiektuaren pedagogia

Hurrengo atalerako ideiak prestatzen ari da Belgikan bizi den familia. "Denbora elkarrekin pasatzeko modu bat aurkitu nahi genuen eta proiektu hau aproposa izan da", azaldu du Errastik, eta zera gaineratu: "Bozetoak seme-alabek marraztu arren, nik neuk atondu ditut; lau urtean asko hobetu dugu marrazten. Gordeta dauzkagu bozetoak eta erakusketa bat egitea ere pentsatzen gabiltza". Durangon aurkeztuko dute, baina badute Bergaran eta Arrasaten ere aurkezteko asmoa.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak