Eroskiko presidente Agustin Markaidek gaur, azaroaren 19an, jaso du Naos Estrategiaren Saria, Enpresa Ekimenaren sailean. Osasun, Kontsumo eta Ongizate Sozialeko jarduneko ministro den Maria Luisa Carcedok eman dio hori.
"Enpresa ekimenik onena"
Guztira 93 proiektu aurkeztu dira Naos Sarien XII. ekitaldira, eta epaimahaikoen iritziz Eroskirena izan da enpresa ekimenik onena Ekilibra programari esker "elikatzeko ohitura osasungarriak hartzen laguntzen dielako herritarrei". Hain zuzen sari horren helburua da gizentasunari eta bestelako gaitz kronikoei aurrea hartzen laguntzen duten ekimenak bultzatzea, elikadura osasungarriarekin eta jarduera fisiko erregularrarekin.
Ekilibra programak informazioaren teknologia berriak erabiltzen ditu nutrizio arloko diagnostiko pertsonalizatua eskaintzeko Eroskiren bezero-bazkideen erosketa ohituretatik abiatuz.
Agustin Markaidek zera adierazi du saria jaso duenean: "Eroskin, orain 50 urte sortu ginenetik, konpromiso sendoa dugu kontsumitzaileen osasunarekin eta ongizatearekin. Kontsumo kooperatiba garen aldetik, gure izaeran doa hori", eta gaineratu du: "Ekilibra programak doan ematen ditu elikadura eta erosketa osasungarriagoa eta orekatsuagoa egiteko informazioa eta pizgarriak. Aitortza honek balioan jartzen du elikatzeko ohitura osasungarriak hartzearen alde egiten dugun ekarpena, eta ildo horretan jarraitzera animatzen gaitu".
Lehenengoz 2008an
Eroskik 2008an ere jaso zuen sari hori, Eroski Zurekin nutrizio eta ongizate programarengatik. Horrez gain, beste hiru akzesit ere baditu 2011n, 2014an eta
2018an lortutakoak.