Antxintxika triatloi taldeko lagunak eta Oliver Hernandezen etxeko eta gertukoak doluan daude, domekan hil zen-eta atleta arrasatearra, 39 urterekin. Kirolerako aparteko dohaiekin, Hernandezek, besteak beste, birritan zapaldu zuen Salamancako triatloiko podiuma –eskaera egin dute datorren urteko edizioa, Espainiako Txapelketa izango dena, Arrasatekoaren oroimenezkoa izan dadin–. Horrekin batera, 2017ko Gasteizko ironman proban Oli zazpigarren sailkatu zen sailkapen orokorrean, eta euskal atleten artean bigarrena izan zen. Federazioak urteko atleten artean nabarmendu zuen Hernandez, ibarreko beste atleta batzuekin batera. Halaxe jaso zuen Goienak.
Gaixotasunaren berri izan zuenetik Oli-ren jarrera nabarmendu izan dute taldekideek beti, eta urte hauetan etengabeak izan dira animo keinuak. Besteak beste Santamas krosean taldekideek eskaini ziotena; Ni zara zu naiz (NZZN) lelodun ekipazioa jantzita, krosa lehen lerroan hasi zuten taldekideek:
"Borrokalari ausarta eta eredu zentzu guztietan. Horrela oroituko zaitugu, lehen lerroan, berdin kirolean zein bizitzan! Hizki larriz diogu, ohore bat izan da guztiondako zure izerdien lekuko izatea", esanaz esan diote agur Oli-ri.
Bihar, martitzena, egingo diote azken agurra, San Juan Bautista parrokian (19:00).
