Julio Galarta pintore arrasatearrak Aramaion ordu asko egin zituen, bereziki, hango paisajeak koadroetara eramaten. Hala, bazuen zentzua haren obrak herrian erakusteak. Pintore arrasatearraren lagunen elkarteak guztira 30 lan batu ditu erakusketa honetarako, eta Sastiñan jarri dituzte ikusgai: "Atzo oso giro polita izan genuen, jendea gerturatu zen Sastiñara, eta gustura ikusi genituen. Tira, herritarrek akats larregi ere ez zizkiguten aipatu, eta gu ere pozik geratu gara", adierazi du Alvaro Arregik. "Halakoetan eztabaida politak sortzen dira, paisaje konkreturen bat nondik aterata dagoen... Desadostasunak ere izaten dira, eta akatsen bat egin genuela esan zigunari apustua bota genion, kar, kar, kar. Gustora geratu gara erakustera polita geratu delako".
Aste barruan arratsaldez zabalik, asteburuetan goizetan
Julio Galartaren Aramaioko erakusketa azaroaren 3ra bitartean egongo da gero irekita, 18:00etatik 20:00etara astegunetan eta 12:00etatik 14:00etara zapatu eta domeketan: "Domu Santu Egunean, jai eguna bada ere, arratsaldez egongo da erakusketa zabalik, 18:00etatik 20:00etara".
Galartaren ahalik eta lanik gehienak katalogatze aldera, elkarteak gustura hartuko luke hemendik aurrera ere pintore arrasatearraren koadroen berri. Etxean artelanen bat dutenei eskatzen diete galartaelkartea@gmail.com helbide elektronikoaren bitartez jar daitezela eurekin harremanetan.
