UDAk eta San Juan de Dios ospitaleak abian jarritako proiektuak hirugarren urteari ekin dio. Iaz, 2018-2019 ikasturtean gurasoak jarri zituzten erdigunean; hainbat bilera egin horiekin eta mapeoak eta datuak jaso zituzten eta gero, galdetegiak betearazi zizkieten. Iazko maiatzean jaso zituzten galdetegi horiek, eta orain emaitzen berri emango dute. Aretxabaletako bilera urriaren 29an izango da Arkupe kultura etxean (18:00) eta Eskoriatzakoa, urriaren 30ean, Ibarraundi museoan (18:00).
Hitzaldietara joateko ez dagoela jakinarazi beharrik adierazi dute UDAko kideek, baina aurreikuspenak egiteko beti lagunduko dietela aurrez izena emateak diote. Hala, bertaratzeko asmoa dutenei ondorengo galdetegia osatzeko eskatu diete. Hemen: galdetegia.
Maiatzean betetako inkesten emaitzen berri emateaz gain, 2019-2020 urteko proiektuak ere aurkeztuko ditu UDAk bilera horretan, hau da, U@DA proiektuaren hurrengo urratsak zeintzuk izango diren jakinaraziko du.
U@DA proiektua
Norberaren ongizaterako, talde lanerako, eta ondorioz, gizartearen eraldaketarako tresna dela kirola uste du UDAK. "Horregatik, kirola amu gisa erabiltzen du UDAk, bere egunerokoan kirol praktika helburu baino bitartekari bihurtu baita. Izan ere, kirolaren bitartez debagoiendarren kontsumo ohituretan eragitea du xede", diote arduradunek. Helburu horrekin sortu zuten UDAk, eta San Juan de Dios ospitaleak, elkarlanean, U@DA proiektua; hiru urtekoa da eta fokua hiru taldetan jarri dute.
- 2017-2018: gazteak
- 2018-2019: gurasoak
- 2019-2020: ingurua
