Egunero 3.000 eta 4.000 erabiltzaileren bueltan sartu da Goiena.eus-en opor sasoian; uztailaren 31 izan da egunik bisitatuena, 6.347rekin, eta gutxien ikusi den egunean ere, abuztuaren 10ean, 2.867 lagun izan dira.
Eskuko telefonoa erabili du erabiltzaileen gehiengoak webgunera sartzeko; hala egin dute 37.935 (%72,48) lagunek; ordenagailu bidez sartu dira 11.900 (%22,74) eta tablet bidez 2.500 (%4,78). Tokiko komunikabideak batzen dituen Tokikom elkarteak emandako datua da 2019ko lehenengo zortzi hilabeteetan –abuztuaren 31a bitartean– Tokikom Plataformaren trafikoaren %25 baino gutxiago etorri dela ordenagailuetatik batez beste, eta abuztuan, %10-%20 artean bakarrik.
Erabiltzaile gehienak penintsulatik sartu dira Goiena.eus-en, %90 hain zuzen ere (48.205), eta gainerakoen artean daude Estatu Batuetatik sartutakoak, 1.661; Erresuma Batutik, 482; Frantziatik, 460; Portugaldik, 219; Alemaniatik, 184; eta Italiatik, 154.
Albisterik ikusienak
Interes gehien piztu duten albisteak honako hauek izan dira: Behar Zana elkarteak Degurixan antolatutako kanpaldia (5.800 inguru), Markel Irizarri agurra (4.500) eta Udalatxera bidean izandako heriotza (3.500). Aretxabaletako Andramaixetako kanalera, ostera, 1.000 erabiltzaile inguru sartu dira.