Ibon Urgoiti, Laboral Kutxako negozio garapenerako zuzendariak eta Joseba Madariaga, Laboral Kutxako ikerketa departamentuko zuzendariak egin dute txostenaren aurkezpena gaur goizean, Bilbon, eta bertan aipatzen da, 2018an ekonomiak izandako bilakaera eta 2019rako aurreikuspenak.
Ekonomia eta politika
Txosten honen arabera, Trumpen administrazio protekzionistak, Brexitak eta Euroguneko arazoek eragin zuzena izan dute mundu mailako ekonomian. Horrek, 2018ko hazkundea, 2017koa baino txikiagoa izatea ekarri du, besteak beste.
Euskal Herrira etorrita, txostenean aipatzen da, 2018an Barne Produktu Gordinak %2,8 egin zuela gora eta horren eraginez, lan merkatuaren bilakaera positiboa izan zela, enplegua %2,1 hazi zelarik EAEn. Langabeziari dagokionez, berriz, %10ekoa izan zen EAEn, 2017an baino txikiagoa.
%2,5eko hazkundea 2019an
Gaur egungo egoera politikoak ekonomiaren egoera baldintzatuko du 2019an. Hazkunde motelak beste ondorio batzuk izango ditu, lan-merkatuan eta prezioetan esate baterako. Izan ere, aurreikuspenen arabera, enplegua ez da hain erraz sortuko eta desinflazio-olatua izatea espero da. Hala ere, txostenean aipatzen denez, %2,5eko hazkundea espero da, Espainia, EAE eta Nafarroan.
Horrez gain, ekonomiaren datu negatiboak ere aipatu behar dira. Izan ere, txostenaren arabera, aurten defizita %3ko mailatik behera kokatuko da eta horrekin batera, beharrezkoak izango dira produktibitatea hobetzeko eta langabezia murrizteko neurriak hartzea.
