Helburua, behar eta kezka horietatik abiatuta, Debagoiena justuagoa, iraunkorragoa eta aukera berdintasunean oinarritutakoa egitea da. Hala, eraldaketa soziala bultzatzeko bideak ahalbidetu gura ditu Berrikuntza Plataforma Irekiak.
Debagoiendarren iritziak jasotzeko ariketa horretan, bakarkako hainbat elkarrizketa egin dituzte: orain arte, 50 inguru. Pertsona horien iritziak jaso eta ondorioak atera dituzte, gero kontraste saioetan eztabaidatzeko. Interpretazio kolektiboko saioak izena dute horiek. Arrasaten egin zuten lehenengoa, Bergaran ere egin dute eta azkenekoa izan da, Oñatin. Kontraste saioek, elkarrizketetatik ateratako ondorioak zuzenak diren berresteko edo azterketa sakonago bat behar duten ondorioztatzeko balio dute.
Kezkak, askotarikoak
Taldeko saio horien aurretik egin diren bakarkako elkarrizketan azaleratutako kezkak askotarikoak dira. Klima aldaketarekin lotutakoak, lanarekin zerikusia dutenak, kulturarekin zein balio transmisioarekin eta abarrekin lotutakoak.
Elkarrizketatutako pertsona horiek eskualdeko aniztasunaren erakusgarri dira. Adin, genero eta jatorri desberdinetakoak aukeratu dira, baita lan-sektore eta lanpostu desberdinetan dihardutenak eta baita, herrigintzako jendea. Izan alderdi politikoetako, elkarteetako eta hezkuntzako ordezkariak.
Entzute ariketa hau etengabe egingo den lan bat izango da eta gainera, horiek osatzeko, beste entzuteko modu batzuk identifikatu eta martxan jarriko dira. Big Data Behatokia da horren adibide bat.
Entzute fasean identifikatuko diren behar eta erronka horietatik abiatuta, irtenbideak bilatzea da Plataformaren egitekoetako bat. Irtenbideak, proiektuak sortzetik edo bultzatzetik etorriko dira. Hori izango da hurrengo urratsa eta hori ere, entzutea bezala, elkarlanean oinarri dela egingo da.