Alavesek hirugarren denboraldia egingo du futbolaren elitean, eta Pitu Abelardok klubean ez jarraitzeko erabakiaren ondoren gasteiztarrek Asier Garitanoren eskuetan utzi dute proiektuaren gidaritza. Alaves Europako postuetan egon da denboraldiko zati handian, nahiz eta liga amaiera luzea egin zaien arabarrei. Bada, Leganesko eta Realeko entrenatzaile izan den Asier Garitanok erronka polita du aurretik, izan ere, jokalari askok taldea utziko dute, eta talde sendoa osatzeko ardura izango du bergararrak. "Erronka polita izango da, baina aldi berean, nekeza. Izan ere, ez da erraza talde bat lehenengo mailan mantentzea" esan du.
Realean izan ez zuen aukera Gasteizen izango du
Alavesek Abelardo agurtu eta bere estilora, zarata handirik atara barik aurreratu du Asier Garitano izango dela entrenatzaile berria. Eta, gaur eguerdian aurkeztu dute bergararra. Hala, Garitanok Realean izan ez zuen aukera izango du proiektu berria gauzatzeko. Hain zuzen Realak duela urtebete fitxatu zuen bergararra, baina Realean denboraldi erdi baino ez zuen egin. Hain zuzen, Alavesen kontra 0-1 galdu eta gero eten zuen Realak Garitanorekin zeukan lan kontratua.
