Galdera-erantzunen euskarazko joko berria da Egunean Behin

Galdera-erantzunen euskarazko joko berria da Egunean Behin

CodeSyntaxen Egunean Behin izendatu duten galdera-erantzunen joko bat (aplikazioa) garatu du. Bakarka edo taldean jokatzeko prestatuta dago eta edukia euskaraz dago. Gainera, Android zein iOs gailuetarako dago eskuragarri. Astebetean mila deskargatik gora lortu ditu jokoak. 

Eguneko partida bat

Izenak adierazten duenez, egunean behin partida bat jokatzeko aukera izango da. Hamar galdera erantzun beharko dira, ahalik eta azkarren. Zenbat eta gehiago asmatu, zenbat eta azkarrago asmatu, hobeto. Partida guztiek logika berdinari erantzuten diote eta jasotako galderen zailtasun maila guztientzat antzekoa izango den arren, galderak desberdinak dira beti. Galdera mota asko aurki daitezke: Zer herritakoa da argazki bat? Nola esaten da limoia iparraldean? eta Zenbat biztanle ditu Zornotzak?, besteak beste. 

Sailkapena eta sariak

Asmatutako erantzun kopuruaren eta pasatako denboraren arabera, puntuak lortuko ditu erabiltzaileak. Puntuen arabera, sailkapenenean gora edo behera egingo da. Sailkapena, astekoa izango da: astelehenetik igandera arteko partidak hartuko dira kontuan. Astero, gainera, sari bat emango dugu. Aste bakoitzeko laguntzaile bat izango du lehiaketak, eta laguntzaile hori izango da asteko sari hori eskainiko duena. Lehen astean, esate baterako, Korrikaren online dendan erabiltzeko 50 euroko bonoa izango da saria.