HBO España ikus-entzunezkoen plataformak gaur eman du ezagutzera Patria-ko aktore nagusien zerrenda, aurretik batzuen izenak aditzera eman bazuen ere. Laskurainek jokatuko du Joxian-en rola eta Olivares osintxuarrak honen semearena, Joxe Mari ETAko kidearena, hain justu ere.
Soraluze, plato bihurtuta
Telesaila Soraluzen grabatuko da gehienbat eta estra lanetan debagoiendar askok hartuko dute parte. Hain justu ere, egunotan buru-belarri dihardute udalerriko erdigunea eraldatzen, 1980ko eta 1990eko hamarkadako herri baten itxura har dezan. Hala, esaterako, Plaza Zaharreko farolak aldatu dituzte, modernoegiak direlako, eta haien ordez klasikoago batzuk ipini dituzte. Izan ere, plato erraldoi bihurtuko da udaberrian Soraluzeko erdigunea.
Elena Irureta (Bittori), Jose Ramon Soroiz (Txato), Ane Gabarain (Miren), Iñigo Aranbarri (Xabier), Susana Abaitua (Nerea), Loreto Mauleon (Arantxa) eta Eneko Sagardoy (Gorka) izango dira beste aktore nagusiak. Sagardoyk eta Mauleonek ere Gabarainen eta Laskurainen seme-alaben papera beteko dute.
Ramon Aramburu idazle donostiarraren eleberri arrakastatsuan oinarrituta dago Patria telesaila. Euskal gatazkaren erdian aurkitzen diren lagun eta familien arteko gorabeherak kontatzen ditu. HBO plataformak estreinatuko du 2020an eta aurtengo udaberrian grabatuko dute Soraluzen, Elgoibarren, Donostian eta Madrilen, zortzi kapituluz osatutako sorta.
Aitor Gabilondo da ekoizlea, eta Felix Viscarret eta Oscar Pedraza zuzendariak.