Iazko azaroaren 23a eta abenduaren 3a artean egin zen ekimenaren lehen edizioaren bukaeran "jarraipena izango duen ariketa" izango zela adierazi zuten Euskaraldiaren sustatzaile diren erakundeen eta eragileen ordezkariek, eta dagoeneko hasi dira bigarrena gertatzen. Hizkuntza ohiturak aldatu eta euskararen erabilera handitzea helburu izan duen ariketa sozialaren bigarren ekitaldia 2020ko udazkenean egingo da.
Entitateek funtzio aktiboagoa
Bigarren Euskaraldiak bi ardatz izango dituela aurreratu dute sustatzaileek: batetik, Euskal Herri osoko herritarrei euren harremanetan hizkuntza ohiturak aldatzen jarraitzeko deia egingo zaie lehen edizioan protagonista izan diren ahobizi eta belarriprest rolen bitartez; eta bestetik, bigarren edizioko berrikuntza modura, era guztietako entitateei beraien funtzionamenduan euskararen erabilera areagotzeko urrats zehatzak ematea bultzatuko da. Erakunde publikoak, enpresak, komertzioak, elkarteak eta gizarte eragileak izango dira konpromiso zehatzak hartuko dituzten entitateak: "Aurrekoan 200 entitatetik gora izan ziren ekimenaren sustatzaile. 2020an, aldiz, urrats bat aurrera egin eta entitateen funtzionamenduan euskararen erabilera eta praktikak babesteko konpromiso zehatzak hartzeko eskaria egingo zaie parte hartzen duten entitateei. Urrats hauek eskatuko duten aurre-lana aintzat hartuta, 2019 urtean bertan hasiko dira entitateak neurriak hartzen eta herrietako batzordeak lanean".
Emaitzak jasotzen
Lehenengo Euskaraldiaren emaitzak jasotzen ari direla asteotan ere adierazi dute. Horrekin batera, Euskaraldiko parte hartzaileen datuen azterketa egin du Gaindegia behategiak. Izena eman duten 220.000tik gora belarriprest eta ahobizien azterketa egin da, eta emaitzak ekimenaren webgunean aurkitu daitezke.