Aurreko urteetan, debagoiendar mordoak agurtu dute urtea korrika eginaz, eta kopuruak gora egingo du aurten, Bergarako, Eskoriatzako, Oñatiko eta Aretxabaletako lasterketei Arrasatekoa batuko zaie eta. Hain zuzen ere, Musakolan antolatuko dutena.
San Silvestre proben aurretik, abenduaren 26an (17:30), San Esteban krosa egingo dute. Aurten, gainera, korrika mozorrotuta egiteko animatu gura ditu herritarrak Udaleko Kirol Sailak.
Hilaren 31n, berriz, goizean (12:00) Musakolan eta Bergaran –mendi lasterketa formatuan– egingo dituzte lasterketak –Eskoriatzan gaztetxoendako probak egingo dituzte goizean–. Arratsaldean, berriz, izango dira Oñatiko 2018 Ixa 2019 San Silvestre lasterketa (16:00etan gaztetxoak, 16:30 nagusiak), Eskoriatzako Silbestradie, Manuel Muñoz Milia (17:25ean brindisa) eta Aretxabaletako San Silvestre proba (16:45 gaztetxoak, 17:00 nagusiak).
