Hamaikatik zazpi pasatu diren honetan, gustura azaldu da Illaro, eta, balorazioak egiten hasteko goiz den arren, sentsazioak "oso onak" direla azpimarratu du. "Oso erantzun ona izaten ari da Euskaraldia. "Parte-hartzeari dagokionez ere oso datu onak ditugu. Espero baino hobeak dira izen-emate datuak, eta hori herrietan egin den lan eskergaren emaitza zuzena da. Euskaraldia 405 udalerritan martxan jartzea herrietako euskaltzaleek erabaki duten zerbait izan da".
Koordinatzailearen esanetan, horrek erakusten du egunerokoan euskaraz bizitzeko gogoa daukan herritar asko dagoela eta ikusten dutela badaukatela beharra ekimen honi heldu eta hau baliatuta urrats batzuk egiteko. "Jende asko dago ez dela bizi berak nahi duen hizkuntzan, zailtasunak dituelako modu batean edo bestean, eta ekimen hau aukera moduan ikusten dute horretarako. Espero dut honek balioko duela arazo hori gizarteratzeko". Gaineratu du izena eman ez duen jende asko ere ari dela konturatzen Euskaraldiaren bueltan dagoen lanaz. "Uste dut konturatzen ari direla badagoela herritar sare handi bat beste zerbaiten beharra daukana. Ekimen honi esker, egunerokoan isilean pasatzen den behar hori nabarmentzen ari da egun hauetan".
Herritarren bizipenak
Illarok dio palanka batzuk mugitzen ari direla egunotan, eta herritarren bizipenak jasotzen ari direla, horren lekuko. "Euskaraldia.eus/bizipenak atarian zenbait bizipen jasotzen ari gara, eta Twitter bidez ere bai. Iruditzen zaigu ohitura batzuk astintzen ari direla, esperientzia positiboak bizitzen ari dela jendea, eta oztopo batzuk ere ari dira identifikatzen. Hori bagenekien, eta ez da txarra horiek jasotzea ere".
Ekimenaren behin betiko eraginkortasuna neurtzeko, ikerketa bat dute martxan, eta "horrek esango digu inertziak astindu ote diren, eta hizkuntza ohiturak aldatu ote diren". Hala ere, uda arte ez dute emaitzen berri edukiko.
Bailaran ere, datu onak
Debagoienean ere izen-emate datuak onak dira. Guztira, 13.458 herritarrek eman dute izena: Antzuolan, 467; Aramaion, 341; Aretxabaletan, 1.454; Arrasaten, 3.882; Bergaran, 3.423; Elgetan, 314; Eskoriatzan, 845, Leintz Gatzagan, 80; eta Oñatin, 2.652.
Euskararen Eguna
Datorren abenduaren 3an emango zaio amaiera Euskaraldiari, Euskararen Egunean. "Egiten ari garena handia da eta merezi dugu ospatzea eta bizipenak partekatzea. Baina ez dugu ekitaldi nagusirik egingo, herrian herrikoa izango da ospakizuna".
Elena Laka: "Pozik gaude ekimena izaten ari den erantzunarekin"
Bide erdia egin du Euskaraldiak. Zer moduz doa? ze jaso duzue? Nolakoa da sentsazioa?
Elkarrizketa elebidunak sortzea izan da erronka nagusietako bat. Moldatzen ari gara horretara? Nola?
Izen-emate datuekin gustura? Esperotako datuak dira?
Euskararen Egunean, abenduaren 3an, borobilduko da Euskaraldia. Nola? Ekitaldi berezirik? zer dago aurreikusita? Non?
Hamabigarren egunetik aurrera orain arteko lortutakoa? mantentzea ere ez da erronka makala izango, ezta?