"Debarroko erlezainak batu eta eztiola sortu nahi dugu"

Eskualdean erlezainen elkartea sortu berri duzue. Badu izenik?
Ofizialki, uztailean sortu genuen: Erleen Adiskideak, Erleen Hedapenaren Aldeko Elkartea. Inguruko erlezainak gugana gerturatu eta, aldi berean, gure zaletasuna herriari erakusten saiatuko gara.

Zergatik elkartea?
Dauzkagun datuen arabera, 70 erlezain inguru daude Deba ibar osoan. Bi, lau, hamar edo 100 erlauntzarekin. Berdin da, guztiak erlezainak. Helburua da inguruko erlezainendako eztiola bat sortzea, irabazi asmorik gabekoa. Hori lortzeko bidean, hainbat jarduera egingo ditugu: azoka, ikastaro, hitzaldi... Denok harreman zuzenagoa edukitzea nahiko genuke.

Sorrera batzarrerako dei egin duzue urriaren 27rako. Non izango da?
Elgetan. Landa Garapen Agentziak eta Debagoieneko Turismo Sailak urtean zehar bertako produktuak ezagutzera ematen dituzte azoka eta ekintza ezberdinen bitartez. Testuinguru horren barruan, urriaren 27an, Elgetan, Erle Eguna ospatuko dugu. Goizez azoka egingo da. Bertako ekoizleen eztiak dastatzeko aukera egongo da... Arratsalderako, esperientzia duen erlezain bat ekartzeko asmoa daukagu erle produktuei buruz jarduteko. Egun aproposa da elkartera gerturatu nahi duen jende orok Elgetako azokara bisita eginez informazioa eskatzeko.

Zer behar da erla onak edukitzeko?
Ez da erraza horri erantzutea. Faktore ugari daude erleak ondo egoteko, baina garrantzitsuena eguraldia da. Sasoian sasoiko eguraldia egiten badu, horrekin konformatzen gara. Hortik aurrera, badaude erleak gaizki egoteko edo erleak hiltzeko beste arrazoi batzuk ere: bere akaro barroa, pestizidak, liztor asiarra...

Eta ezti ona egiteko?
Erleak egin duen lana ahalik eta gutxien ukitzea da onena. Eztia behar den momentuan atera behar da, produktuaren hezetasuna ahalik eta urriena izan dadin. Era berean, eztia atera behar dugunean, ke hauspoa ahalik eta gutxien erabiltzea garrantzitsua da, eztiak ke usainik ez dezan hartu.