Sarrerak agortuta ez da sarritan euskal ikuskizunetan irakurtzen den oharra, baina, aurrez izan diren herrietan moduan, Debagoienean ere aurre-salmentako txartel guztiak agortu dituzte Iker Galartzak eta haren lantaldeak eskaintzen duten Gure zirkua ikuskizunean.
Hiru geltoki geratzen zaizkie
Iaz urrian probatxo bat egin zuten Tolosako zezen-plazan, eta, emaitzarekin gustura, aurtengo ekainean abiarazi zuten zirkua gurpilen gainean. Amezketan, Galartzaren herrian, egin zituzten lehenengo saioak; geroago, Aian, Urretxun, Zumaian... ere izan dira. Domekan Eskoriatzako karpa desmuntatu eta Nafarroara, Urdiainera, joango dira astebetez; handik Elgetara, eta azkeneko emanaldiak Donostian egingo dituzte segidan. "Txikitako ametsa nuen zirkua, eta arriskatu eta errealitatea da orain. Asko ari naiz gozatzen emanaldietan eta baita muntaketa eta bestelako lanetan ere. Ederra da ezer ez dagoen tokian zerbait eraikitzea, eta politak dira oso herritarrekin bizitzen ditugunak. Tokian tokiko ezustekoak izan ditugu, baina poliki poliki joan gara horiei irtenbidea ematen eta horietatik ikasten", dio Iker Galartzak.
Hamar laguneko lantaldea
Joseba Usabiaga (Don Martinez aurkezlea Gure zirkuan) aspaldiko lagunari proposatu zion Galartzak "abentura berria" abiaraztea, eta poliki-poliki kide gehiago "arrimatzen" joan zitzaiela gaineratu du gaurko Puntua aldizkarian egin dioten elkarrizketa zabalean: "Katalunian zirkua egiten zortzi urtez ibili izan den Koldo Arakistain etorri zitzaigun hasteko, eta haren eskutik, geroago, beste hainbat lagun: Asier Kidam magoa; Irati Gonzalez, Arakistainek moduan, telak eta akrobaziak airean eta lurrean egiten dituena; Ekain Ibarguren malabarista, Garazi Pascual alanbrean ibiltzen dena, Iraitz Lizarraga trapezista... Horiez gainera, familiakoak ere edozertan laguntzeko gertu izaten ditugu beti".
Osagai tradizionalak dituen zirkua dela gaineratu du: "Betikoa da, baina gurea, tokatzen den moduan, euskal kutsuduna".