goiena.eus

Silvia Triguerosek irabazi du Tor des Geants proba, Italian

  Kirola  Debagoiena  Eskoriatza

Silvia Trigueros mendi lasterkariak sekulako balentria egin du, Aosta bailaran egiten duten munduko lasterketa gogorrenetakoa irabazi berri du-eta (330 kilometro, 24.000 metrotako desnibela). Domekan hasi zuten proba, eta Fagor Ederlanen lan egiten duen bizkaitarra goizaldean iritsi da helmugara, 87:50:31ko denbora egin eta gero.

Silvia Triguerosek irabazi du Tor des Geants proba, Italian
Silvia Trigueros, goizaldean, Tor des Geants lasterketako helmugan. Argazkia: Tor des Geants. | Ikusi handiago | Argazki originala

Azken urteotan Silvia Trigueros estatu mailako ultra lasterketetan erreferente bilakatu bada, duela ordu gutxi mundu mailako erreferente izatera pasa da Eskoriatzan lan egiten duen mendi lasterkaria. Tor des Geants ultra lasterketako helmuga lehenengo postuan gurutzatu du-eta duela ordu gutxi, goizaldean. Horretarako bizkaitarrak ia 88 ordu erabili ditu (87:50:31), pentsa zelako lasterketa den.

"Bihar ez dakit nola egongo naizen, baina orain momentuan hankak uste baino hobeto ditut", adierazi du helmuga gurutzatu eta lagunekin berriketan lasai-lasai geratu den korrikalariak: "Pentsa, azken kilometroan estutu ere egin dut, ondo iritsi naizen seinale". 

Horren lasterketa luzea izanda helmugan ez zegoen aparteko girorik, korrikalariak tarte handiaz iristen direlako helmugara, eta gainera, goizaldean helmugaratu da. Baina, bizkaitarraren aurpegiko irribarreak ez zuen publiko gehiago behar, sekulakoa egin du. 

Bada, poliki-poliki euskal lasterkariak geroago eta protagonismo handiagoa hartzen dabiltza lasterketa horretan. 2013an Iker Karrerak irabazi zuen txapela, iaz Javi Dominguez gasteiztarra nagusitu zen, eta 2018an Silvia Trigueros izan da onena.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa