Gipuzkoako Probintziako Artxibo Historikoak aro berria hasiko du Aldundiaren eskutik

Maria Jose Telleria eta Denis Itsaso, aurrera begirako asmoak azaltzen

Orain arte Eusko Jaurlaritzaren eskuetan egon den Gipuzkoako Probintziako Artxibo Historikoa Foru Aldundiak kudeatuko du aurrerantzean. Diputazioko Kultura zuzendari Maria Jose Telleriak eta Kultura, Turismo, Gazteria eta Kirol diputatu Denis Itsasok aro berrirako dituzten asmoak aurreratu dituzte goizean. Oñatin kokatuta dagoen eraikinaren potentzialitatea azpimarratu dute eta ahalik eta etekin handiena ateratzeko nahia azaldu.

Bertan gure historia ezagutzeko izugarrizko balioa duten altxorrak gordetzen direla azaldu dute, Espainiako estatuak XIX. mende amaieratik ia gaur egunera arte Gipuzkoan sortutako dokumentazioa, alegia. Eta memoria historikoarekin erlazionatutako materiala azpimarratu dute, Gipuzkoako espetxeetako eta Gobernu Zibilaren funtsak tartean. Ildo horretatik, Denis Itsasok adierazi du Gipuzkoako Probintziako Artxibo Historikoak ahalik eta gehien zukutuko dituela dokumentu horiek guztiak, gure historia argitzen laguntzeko eta egia eta justizia egiteko, memoria historikotik eta zorroztasun dokumentaletik. "Funts horiek inplementazio gutxi izan dute lurraldean, artxibo historikoaren ibilbide laburragatik eta pertsonal eta baliabide material eskasiarengatik", gaineratu du.

Gipuzkoako Protokoloaren Artxibo Historikoko funtsak ere bertara

Asmoa da, gainera, urtea bukatu baino lehen -urrian edo azaroan- Oñatiko unibertsitate zaharrean dagoen Gipuzkoako Protokoloaren Artxibo Historikoko funtsak ere bertara lekualdatzea, kokaleku berriak kontserbazio eta segurtasun baldintza hobeak eskaintzen dituelako, besteak beste. Horrekin batera, toki bietako lantaldeek bat egingo dute -lau lagun ariko dira, guztira- eta beste hiru lanpostu berri sortuko dituzte.

Instalakuntzekin lotuta ere badira nobedadeak: ikerlarien aretoa bitan banatuko dute eta aurrerantzean langileentzako eremua ere izango da bertan. Eta orain arte erabili gabeko dokumentazioa zaharberritzeko laborategia martxan jarriko da.

Erlazionatuak

Gipuzkoako Probintziako Artxibo Historikoa: funtsak eta instalakuntzak

Oñati

Aro berrirako asmoak aurkezteko ekitaldian, bisita gidatua egin dute eraikineko instalakuntzak ezagutzera emateko, eta bertan gordetzen diren funts...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.