Jaso dute saria Ekiten programara aurkeztu diren proiektu onenek

Ekiten lehiaketaren bultzatzaileak, babesleak eta irabazleak, goizean Arrasaten egindako ekitaldiaren ostean.

34 proiektu aurkeztu dira aurten programaren lau kategorietara. Enpresa Ideia Berrien mailan, Zustatic proiektuak eroan du lehen saria. Landa Garapenerako Ideiak eta Proiektuak kategorian, Gazta sektoreko azpiproduktuekin egindako garagardoa proiektua izan da epaimahairentzat onena; Pertsonen Bizitza Errazteko Zerbitzuen artean, Sharik enpresa; eta Mondragon Unibertsitate Sareko mailan, Mobility Safe enpresa.

 

Proiektuen bideragarritasuna; enplegua eta aberastasun gehien sortzeko gaitasuna; originaltasuna; eta Interneten jendearen artean izandako onarpena. Faktore horiek hartu ditu aintzat Ekiten ekintzailetza-programako epaimahaiak aurten parte hartu duten 34 proiektuak baloratu eta onenak aukeratzeko orduan. Parte-hartzaileetako bost, gainera, Latinoamerikako unibertsitateetako ikasleek osatutako taldeak izan dira.

Mondragon Unibertsitatearen Arrasateko campusean izan da sari banaketa. Irabazle eta finalistek Nekane Errasti Mondragon Unibertsitateko Goi Eskola Politeknikoko koordinatzaile akademikoaren; Inma Ramos Gaztenpresako arduradunaren; Agurtzane Diaz eta Agurtzane Etxaniz Landaola landa-garapeneko elkarteen federazioko ordezkarien; eta Kimu Berriko arduradun Mikel Orobengoaren eskutik jaso dituzte sariak. Lehenengo sailkatu diren proiektuek 1.000 euroko saria jaso dute, eta bigarren eta hirugarren sailkatuek, 500.

20018ko Ekiten lehiaketako irabazleak eta finalistak

Enpresa Ideia Berriak

 1.- Zustatic

Sentsoreak dituzten barne-zola horiei esker, profesionalek denbora errealean jasotzen dituzte pazienteen oinkadei eta ibiltzeko zein korrika egiteko moduari buruzko datuak.

2.- Daphkit

3.- Intelligent Surf

Landa Garapena

1.- Gazta-sektoreko azpiproduktuekin egindako garagardoa

Esne-gazura oinarri hartuta artisau erako edariak egiten dituen garagardotegia.

2.- BerrizEcotourism

3.- Ez da sariturik izan

Pertsonen Eguneroko Bizitza Errazteko Ideia eta Zerbitzu Berritzaileak

1.- Sharik

Indian lan egiten duen enpresa soziala da, eta identitate-eskubidea bermatzea helburu duen jaiotza-erregistroa proposatzen du; sistema malgua, inklusiboa eta globala

2.- Haur-kotxe elektrikoa

3.- Sign Talk

Mondragon Unibertsitatearen Sarea

1.- Mobility Safe

Geokokatzeko sistema duen APP horrek aukera ematen die txirrindulariei mapan sartu eta inguruetan lapurtutako bizikletaren bat ote dagoen jakiteko.

2.- App Voc

3.- Ez da sariturik izan

 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.