Haur eta nerabeen obesitatea prebenitzeko ekimena jarri du abian Debagoieneko ospitaleak, Mankomunitatearen laguntzarekin, eta kirol-teknikarien eta Berritzegunerekin lankidetzan. Hala, ikastetxe eta Udal guztietara heltzea da asmoa, eta baita, osasun arlora ere.
Zabalkunde-kanpaina
Ainhoa Parra, Eibarko Berritzeguneko aholkulariak adierazi du zabalkunde-kanpaina jarri dutela martxan ohitura onak sustatzeko, eta horretarako, mezua zabaltzearen garrantzia azpimarratu du: "Berritzegunea hezkuntza departamenduko zerbitzua da, eta ekimen honetako bileretan parte hartu dugu ideiak eman eta jasoaz. Gainera, hezkuntzatik, aukerak ditugu familia eta ikasleekin egoteko, eta mezuak transmititzeko aukera ematen digu kanpaina honek.
Informazioa ikastetxeetara zabaltzeaz gain, leku publiko eta kirol guneetara heltzeko asmoa ere badutela adierazi du, bestalde, Iñaki Ugarteburu, Debagoieneko Kirol Teknikarien ordezkariak: "Elikaduraren inguruko mezuak, jarduera fisikoaren inguruko mezuak, higienearen aholkuak… zabalduko ditugu bizitza osasuntsuagoa izateko".
Ohitura aldaketaren bila
Duela lau urte, Debagoieneko Lehen Hezkuntzako haurrekin ikerketa bat egin zuten, eta 6-12 urte bitarteko haurren artean, heren batek gainpisu arazoak zituztela antzeman zuten. Hori horrela, egoera horri buelta eman nahi diote. "Epe ertain eta luzera begira, aldaketa nabarmenak izaten dira bizitsa osasuntsu bat eramanez, eta hori sustatu beharra dago. Ohiturak txarrera aldatu dira: jaten dugun janari asko tratatua dago, azukre askorekin. Lehen haurrek kalean jolasten zuten, eta gaur egun, pantailari begira ordu larregi egoten dira, kirola ere gutxiago egiten dugu…, eta hori aldatu beharra dago".