Orain arteko etapetan Euskadi Murias taldeko txirrindulariak aurpegia ematen dabiltza. Lehenengo etapan hainbat ordezkari eguneko ihesaldietan sartu ziren, eta martitzenean, Bermeoko helmugan, Edu Prades seigarren helmugaratu zen, Julian Alaphilippen, Roglicen, Gorka Izagirreren, Landaren eta Konraden atzetik. Hala, talde euskalduna World Tour barruan egiten dabilen debutaren testigu izango da GOIENA, Barru izeneko saioan Odriozolaren taldeak Itzulian bizitako azken egunak jasoko ditu-eta erreportajean.
Eibarko etapak
Egubakoitz arratsaldean Eibarko helmugan abiaraziko dugu erreportajea, eta 24 orduz jarraituko dugu talde euskalduna, zapatuko etapa erabakigarrian –Arraten amaituko dena– Itzulia amaituko den arte.
Gogoan izan Euskadi Murias taldean Debagoieneko hainbat ordezkari daudela. Julen Irizar eta Mikel Aristi ziklista bergararrak ez daude Itzulian, beste lasterketa batzuetan dabiltza buru-belarri. Baina taldeko zuzendariarekin batera, Jon Rivero bergararra, Ibai Agirreurreta gatzagarra eta Eneko Garai aretxabaletarra ere Muriaseko taldekide dira.