Gipuzkoa Encounter topaketak 600 parte-hartzaile eta 2.600 bisitari elkartu ditu

Informatikaren eta teknologia berrien zaleak biltzen dituen Gipuzkoa Encounter topaketak aurreikuspen guztiak gainditu ditu: 600 parte-hartzaile eta 2.600 bisitari, orotara 3.200 lagun batu ditu asteburuan Tolosan.

Antolatzaileak oso pozik agertu dira egitasmoa nola joan den ikusirik: prestakuntza-ekintzen eskaintzari esker, partaideek aukera izan dute segurtasun informatikoaren, errealitate birtualaren edota 3D inprimaketaren gaineko ezagutzak partekatzeko; eta Opengunean edo eremu librean ere, hitzaldi eta tailerren bidez, gai anitzen inguruan ikasteko aukera izan da: zibersegurtasunaz, datu pertsonalen babesaz eta dronei buruz, esaterako.

Markel Olano diputatu nagusiak adierazi du ekimen isolatu bat izatetik, egungo errealitate ekonomiko eta sozialarekin gero eta lotuago egotera igaro dela.