Seminarixoa, Kantariren geltokia asteburuan

Zabalotegi aretoan egin zituzten entsegu orokorrak, aurreko asteburuan.

7 eta 11 urte bitarteko Bergarako, Antzuolako eta Elgetako 258 gaztek hartuko dute parte bihar eta etzi grabatuko dituzten Kantari karaoke saioaren grabaketetan; apiriletik aurrera izango dira saio horiek Goiena telebistan ikusgai.

Aretxabaletako Arkupe kultura etxean eta Oñatiko gaztelekuan grabatu dituzte dagoeneko Goienak Debagoieneko ikastetxeen eta Udalen laguntzarekin antolatzen duen Kantari saioko kapitulu berriak. Bihar eta etzi, Bergarako Seminarixoa bihurtuko dute euskal kantuak oinarri dituen karaokearen plato.

Hiru herritako artistak

Bergarako, Antzuolako eta Elgetako neska-mutikoak izango dira oraingoan protagonista. Guztira, 258 gaztetxo izango dira oholtzaren gainean –Bergarako 196 lagun, Antzuolako 57 parte hartzaile eta Elgetatik bost gaztek osatutako taldea–. Ohi moduan, grabazio egunetarako dena prest izateko, aurreko asteburuan  entsegu orokorrak egin zituzten Zabalotegi aretoan Aitor Agirianok eta Miren Ibabek  gidatuta. "Oso ondo prestatuta daudela ikusi dugu entseguetan. Sekulako artistak daude Bergaran, Antzuolan eta Elgetan. Kantuak ondo prestatuta ekartzeaz gainera, koreografia oso landuak zituztela erakutsi ziguten; bitxikeria moduan, esan, askok gimnasia erritmikoan erabiltzen diren pausuak eta teknikak sartu dituztela koreografiatan, hortaz, txiri-bueltak, erruberak, eta horrelako hainbat ikusiko dituzue. Kantu zerrendari dagokionez, orain arte moduan, euskal kantu tradizionalak eta modernoagoak entzungo dituzue: Ilargia, Iñaki, Lazata, Euskaraz bizi nahi dut, Beldurrik ez, Aldapan gora...", kontatu du Aitor Agirianok.

Hamar telebista saio

Eguneko bost saio grabatuko dituzte, eta bi egunetan ordutegi bera izango dute grabaketek: 16:00etatik 20:00ak bitartean. "Apiriletik aurrera izango dira saio horiek Goiena telebistan ikusgai baina edonor etor daiteke Seminarixora grabaketak ikustera. Ez da ezer ordaindu behar eta ez da sarrerarik behar. Bide batez, biharko eta etziko parte hartzaileen guraso edo arduradunei gogorarazi gura diegu, astelehenean Whatsapp bidez jasoko dituztela asteburuan  aterako ditugun argazkiak; eta modu berean jasoko dutela, saioak telebistan eskaini ondoren, saio osoa eta talde bakoitzaren bideoa ere bai".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.