Mintzalagun izateko euskaraz komunikatzeko gai izatea eta asetan ordubetez elkartzeko konpromisoa hartzea, bi baldintza horiek bete behar dira. Gertuko harremanetan ahaleginak batzeko giltzarri nagusietako bat izan gura duen egitasmoa da. Hartu, eman eta eragin egiten duena. "Bidelarien eta bidelagunen hartu-emana mintzapraktitako taldetik harago zabaltzen da. Elkarrekin, euskaraz bizitzeko espazio berriak eraikitzen dituzte. Horregatik diogu hartu, eman eta eragin egiten dela", esan du Elgetako Berbetan egitasmoaren koordinatzaile Geaxi Ezpeletak.
Borondatezko lana
Mintzalagun izateko euskaraz komunikatzeko gai izatea eta astean ordubetez elkartzeko konpromisoa hartzea, bi baldintza horiek bete behar dira. Euskaraz naturaltasunez moldatzen diren lagunak mintzamena hobetu nahi dutenekin elkartzen dira. Borondatez.
Gaur egun Mintzalagunen sarea 6.000 pertsonak baino gehiagok osatzen dute, eta haietatik 1.200 bidelagunak dira. 1.000 taldetik gora daude martxan eta 120 herritan elkartzen dira.
Bailaran, Debagoienean, 200 lagunetik gora parte hartzen du. Dena den, izena emateko epea zabalik dago bidelari eta bidelagun berriendako.
Goiena telebistaren dokumentala
Mintzalagun egitasmoaren garrantzia bere hartuta, Goiena Telebistak horren gaineko dokumental bat egin du, Mintzalagunak. Sare bat inguruan. Bidelagunak alboan izenarekin. Mintzalagunek egunerokoan zer egiten duten eta horrek euskal hiztun moduan zer suposatzen dien jaso dute. "Harrera oso ona izan dugu. Eskerrik asko dokumentalean parte hartu dutenei eta baita, haiengana iristen lagundu diguzuen guztiei", esan du Goienako kazetari Larraitz Zeberiok. Dokumentala urriaren 11n emango dute Goiena telebistan.
Arrasateko Zahar-Berrik, 20 urte
Azkenik, Arrasateko Zahar-Berri egitasmoaren 20. urteurrenaren harira, egun osoko jardunaldia egingo dute urriaren 19an. Mintzapraktika programen inguruko ekarpenak egin eta egitasmotik kanpoko eragina zabaltzeko proposamenak aurkeztuko dira.
