Hazilan proiektuak eskualdeko gazte kualifikatuen laneratzea du helburu eta bi fasetan osatzen da. Lehen fasean, 80 orduko prestakuntza praktikoa jasotzen dute parte-hartzaileek konpetentzia pertsonaletan, profesionaletan eta lan-bilaketarako trebetasunetan. Bigarren fase batean berriz, praktikak egingo dituzte eskualdeko enpresetan. Izan ere, proiektua Debagoieneko 20 eta 44 urte bitarteko gazte langabeei, goi mailako heziketa zikloa edo unibertsitate ikasketak bukatuta dituztenei eta ikasketa horiekin esperientzia esanguratsurik ez dutenei zuzenduta dago. Enpresek, aldiz, gazte kualifikatu horien potentzialtasuna ezagutu eta proiektu berriak garatzeko aukera dute.
Enpresei eta gazteei zuzendutako bi saio informatibo antolatu ditu Debagoieneko Mankomunitateak Hazilan proiektuari buruzko informazioa eman eta zalantzak argitzeko. Saio hauek irailaren 15ean izango dira Debagoieneko Mankomunitateko Udalaitz aretoan, goizeko 9etan enpresentzako saioa eta 11:00etan norbanakoentzako saioa. Praktiketan gazte kualifikatuak hartu nahi dituzten enpresa eta erakundeek, saiora joan gabe ere eskaerak egin ditzakete irailaren 26a arte, 943793090 telefonoan edo hazilan@debagoiena.eus helbidean. Parte hartzea nahi duten norbanakoek aldiz, Debagoieneko Goi mailako titulatuen poltsan izena eman beharko dute irailaren 20a baino lehen. Horretarako, debagoiena.eus webgunetik eskaera orria deskargatu eta Debagoieneko Mankomunitateko egoitzan aurkeztu behar da dagokion dokumentazioarekin batera.
Laugarren edizioa izango da oraingoa 2016an martxan jarri zenetik eta aurreko hiruetan denera 43 pertsonak parte hartu dute, horien artean gehiengoa emakumezkoak izanik, 26 zehazki. Behin praktikak amaituta, 10etik 7k lanean jarraitzen dute praktikak egin dituzten enpresan edo beste enpresa batean. Hazilan proiektuaren edizio desberdinak Euskal Herriko 2014-2020 programa operatiboaren bidez gauzatu dira, hain zuzen ere, programa honen finantziazioaren %50a EGIF-ek eman du eta Garapenek koordinatzen du.